17. ŜULDO DE DUONO DE MONERO

Esperantigis 妙慧师父

Antaŭe estis komercisto. Oni ŝuldis al li duonon de monero kaj ne redonis ĝin dum longa tempo, do li iris por postuli la monon.

Rivero baris al li la vojon kaj li devis pagi du monerojn por transpasi ĝin per boato. Atinginte la cellokon, li ne trovis la ŝuldanton, kaj denove elspezis du monerojn pro la rivero sur la vojo hejmen.

Li elspezis kvar monerojn pro la ŝuldo de duonmonero, kaj krome suferis de lacega vojaĝo. Li elspezis tro multe por la malgranda sumo, kaj pro tio estis mokita de homoj.

Ankaŭ iuj homoj en la mondo estas samaj. Ili rompis siajn observitajn disciplinojn kaj ignoras la moralon pro iom da privata bono. Ili havas malbonan reputacion en la nuna vivo kaj suferos de malbona konsekvenco en la estonteco.